Mae Cyngor Sir y Fflint yn falch o fod yn rhan o fenter Trawsnewid Trefi Llywodraeth Cymru, sydd wedi’i dylunio i gefnogi adfywio trefi ar draws Cymru. Mae menter Trawsnewid Trefi yn darparu cyfleoedd am fuddsoddiadau cyfalaf i gynlluniau sy’n cefnogi nodau ac amcanion y rhaglen. 

Yn Sir y Fflint, mae cyllid ‘Grant Creu Lleoedd’ Trawsnewid Trefi a chyfleoedd buddsoddi ar ffurf benthyciad di-log ar gael ar hyn o bryd, i gefnogi darpariaeth amrywiaeth eang o brosiectau yng nghanol ein trefi. Gall prosiectau amrywio o ddatblygiadau isadeiledd gwyrdd i wella bioamrywiaeth a gwella mannau cyhoeddus; i welliannau masnachol a phreswyl mewnol ac allanol i berchnogion busnes.

Mae’r cyllid yn ceisio cefnogi creu canol trefi ffyniannus, sy’n cynnig mannau gweithio hyblyg a rhagor o fynediad i wasanaethau i breswylwyr lleol ac ymwelwyr â chanol ein prif drefi. Mae’r prosiect yn ceisio sicrhau bod ein trefi’n fwy gwyrdd a deniadol a’u bod yn lleoedd ffyniannus i ymweld â nhw – gan arddangos eu nodweddion gorau a sicrhau bod pawb sy’n byw neu’n gweithio yng nghanol y dref neu sy’n ymweld â hi, yn cael croeso.

Mae’r cynllun ar agor i fusnesau preifat, gan gynnwys datblygwyr, busnesau’r trydydd sector a’r sector cyhoeddus. Nid yw ar gael i unigolion preifat.

Dylai ymgeiswyr posibl ddarllen ein Cwestiynau Cyffredin a chysylltu â Swyddogion Adfywio Cyngor Sir y Fflint i ddechrau er mwyn trafod unrhyw gynigion ac i weld a ydynt yn gymwys i gael y cyllid grant. Mae’r gwasanaeth hwn yn rhad ac am ddim.

I gael rhagor o wybodaeth a manylion am sut i wneud cais, cysylltwch â regeneration@flintshire.gov.uk 

Grant Gwella Eiddo Canol y Dref (TCPIG)

Mae dwy ffrwd i’r Grant Gwella Eiddo Canol y Dref, caiff un ei chefnogi gan Raglen Trawsnewid Trefi Llywodraeth Cymru a’r llall gan Gronfa Ffyniant Gyffredin Llywodraeth y DU. Sefydlodd Llywodraeth Cymru y grant hwn i gefnogi busnesau yng nghanol trefi a dinasoedd i ddatblygu ac uwchraddio eu heiddo. Yn ddiweddarach, gwnaeth Tîm Adfywio Cyngor Sir y Fflint gais i Lywodraeth y DU i ychwanegu cynllun arall i gefnogi canol trefi ymhellach ar draws y sir. Rydym ni’n cydnabod bod busnesau canol tref yn parhau i wynebu cyfnod economaidd heriol iawn a gall y grant hwn helpu i wella eiddo’r busnes a chefnogi bywiogrwydd hirdymor canol ein trefi.  

Cwestiynau Cyffredin

Beth yw’r Grant Gwella Eiddo Canol y Dref?

Lansiwyd cynllun Llywodraeth Cymru ym Mwcle, Shotton a Threffynnon am flwyddyn o fis Ebrill 2023 (Treffynnon o fis Awst 2023) fel cynllun peilot. Mae’r grant ar gael ar gyfer busnesau annibynnol, bychan a chanolig sy’n gweithredu (neu’n bwriadu gweithredu), yng Nghanol Tref Bwcle, Shotton neu Dreffynnon.

Lansiwyd cynllun Llywodraeth y DU ym mis Gorffennaf 2023 ac mae’n cynnwys eiddo yng nghanol y saith tref yn Sir y Fflint; Bwcle, Cei Connah, y Fflint, Treffynnon, yr Wyddgrug, Shotton a Queesnferry. Mae’r grant ar gael ar gyfer busnesau annibynnol, bach a chanolig yn y trefi hyn.

Mae’n rhaid i’r prosiectau gwella gael eu cwblhau erbyn diwedd mis Mawrth 2024 ar gyfer grant Llywodraeth Cymru a grant Llywodraeth y DU. Felly, rydym yn eich annog i wneud cais yn gynnar i gydymffurfio â’r amserlen hon gan ein bod yn disgwyl llawer iawn o ddiddordeb yn y grantiau hyn.

Mae’r cynllun yn cynnig cefnogaeth i feddianwyr a pherchnogion adeiladau manwerthu a masnachol. Gellir defnyddio’r grant i wella blaen adeiladau ac i droi gofodau masnachol gwag yn ofodau busnes buddiol unwaith eto ac i roi pwrpas newydd i eiddo ble’n briodol.

Prif bwrpas yr arian yw ceisio gwneud gwir wahaniaeth i ymddangosiad canol ein trefi a’n dinasoedd trwy eu gwneud yn lleoedd mwy deniadol i ymweld a gweithio; ac annog pobl i dreulio eu hamser a gwario eu harian yno.  Felly bydd y Cyngor yn cefnogi gwelliannau i eiddo busnes o fewn y brif ardal fasnachol (yn gyffredinol y stryd fawr - neu debyg - a lleoliadau cyfagos).

Pa waith sy’n gymwys?

Gall cwmpas arfaethedig y gwaith ar yr eiddo gynnwys y canlynol:

Byddai gwaith allanol i flaen yr adeilad yn cael ei ystyried heb yr angen am waith mewnol. Gall hyn gynnwys gwaith y bernir ei fod yn angenrheidiol er mwyn uniondeb strwythurol a defnydd yr eiddo, yn enwedig pan fo newid defnydd. Gall eitemau gynnwys:

• Blaen Siopau
• Gwella Ffenestri Arddangos  
• Gwelliannau i Arwyddion
• Ffenestri a Drysau 
• Goleuadau Allanol 
• Toeau a Simneiau  
• Nwyddau Dŵr Glaw
• Rendro, Glanhau ac Atgyweirio Cerrig, Ail-bwyntio a 
• Gwaith Strwythurol 

Byddai gwaith mewnol ond yn gymwys i gael yr arian fel rhan o becyn o welliannau allanol i’r adeilad, neu pan fo angen newid defnydd arfaethedig.  Dylai hyn gynnwys yr holl waith, gweledol neu strwythurol, sydd ei angen i gwblhau’r prosiect i safon Rheoliadau Adeiladu. Gallai hyn gynnwys:  

• Ffenestri a Drysau
• Gwell Hygyrchedd 
• Waliau, Nenfydau, Goleuadau  
• Cyfleustodau a Gwasanaethau, gan gynnwys Gwresogi
• Cyfleusterau Lles (e.e. cyfleusterau glanhau ac ymolchfa hanfodol yn unig); a 
• Gwaith Strwythurol 

Hefyd, bydd unrhyw waith i wella effeithlonrwydd ynni adeilad (e.e. insiwleiddio gwell), yn gymwys, fel rhan o gyfres ehangach o waith.

Rwy’n ddeiliad prydles, ydw i’n parhau i fod yn gymwys? 

Bydd y grant a benthyciadau ar gael i berchnogion buddiant rhydd-ddaliadol yr eiddo neu unigolion sydd â phrydles gyda 7 mlynedd neu fwy ar ôl ar ddyddiad y cais, ac sydd wedi cael caniatâd ysgrifenedig gan eu landlord ar gyfer y gwaith arfaethedig. 

Sut ydw i’n gwneud cais?

Y cam cyntaf yw cysylltu â’r Tîm Adfywio ar e-bost ar regeneration@flintshire.gov.uk i drafod eich cais. Bydd y Tîm Adfywio yn sicrhau eich bod yn hollol wybodus ac yn cael eich cefnogi trwy gydol y broses.  Gall y Tîm Adfywio ddarparu ffurflen gais a chynorthwyo i’w llenwi a sicrhau eich bod yn gwneud cais i’r ffrwd ariannu gywir, boed hynny’r gronfa sy’n cael ei chefnogi gan gronfa Trawsnewid Trefi Llywodraeth Cymru neu Gronfa Ffyniant Gyffredin Llywodraeth y DU. 

Beth ddylwn ei gynnwys gyda’r ffurflen gais i gefnogi fy nghais?

Dylid llenwi’r ffurflen gais yn unol â’r canllawiau a gynhyrchwyd i gynorthwyo ymgeiswyr a dylai gynnwys dyluniadau a chostau llawn ar gyfer y prosiect. Efallai y bydd angen i chi ddarparu rhai, neu bob un o’r canlynol yn dibynnu ar y prosiect.

• Lluniau diweddar o’r eiddo
• Hysbysiad o gymeradwyaeth cynllunio a chynlluniau/darluniadau cymeradwy 
• Cynlluniau ac amserlenni gwaith mewnol ac allanol
• Caniatâd statudol perthnasol megis rheolaethau adeilad  
• Benthyciwr morgais neu ganiatâd landlord os yw’n berthnasol
• Datganiad yn dangos ffioedd, megis ffioedd proffesiynol fel rhan o’r gwaith cyfalaf.  Cadarnhad y gellir talu cost lawn y gwaith cyn cyflwyno’r hawliad grant. (Gallai hyn fod ar ffurf llythyr gan y banc)
• Mae angen gwybodaeth ariannol at ddibenion diwydrwydd dyladwy er mwyn bod yn hyderus fod arian cyhoeddus yn cael ei fuddsoddi’n briodol 
• Gwybodaeth am gynllunio busnes i gefnogi’r fenter arfaethedig 
• Copi o weithredoedd teitl neu ddogfen brydles

Cynghorir y dylid cyflogi pensaer proffesiynol neu asiant tebyg i gynorthwyo wrth ddylunio a rheoli’r prosiect.  Ni all y grant dalu am gostau sy’n gysylltiedig â hyn ond maent yn gymwys ar gyfer arian cyfatebol.

A oes unrhyw amodau penodol yn ymwneud â’r grant hwn?

Oes, bydd angen i chi gael y caniatâd cynllunio / rheoli adeiladu arferol cyn y gall unrhyw geisiadau gael eu hystyried.

Sut bydd fy nghais yn cael ei asesu?

Bydd y cynlluniau’n cael eu cyflwyno i Banel Adfywio Sir y Fflint ar gyfer penderfyniad am y cais grant. Mae’r dyddiad cau ar gyfer cyflwyno cais i’w ystyried yn ystod un o gyfarfodydd misol y panel wedi’i nodi isod. Yn ogystal, cewch hefyd wybodaeth am ddyddiad cyfarfodydd y panel a’r dyddiad y cewch chi wybod a yw’ch cais wedi bod yn llwyddiannus ai peidio. 

Sylwch ni fydd y panel yn cynnal cyfarfodydd os yw’r holl gyllid wedi’i ddyrannu’n gynt. Hyn a hyn o gyllid sydd ar gael ac mae’n debyg y bydd galw mawr am y grant, felly anogir ymgeiswyr i gyflwyno eu ceisiadau yn fuan. 

Caiff y ceisiadau eu hasesu ar sail y budd i’r ardal leol, yn cynnwys yr amgylchedd, ond gall lefel y grant (yn amodol ar reolau cymorth gwladwriaethol) fod yn gyfyngedig yn dibynnu ar faint a natur y prosiect arfaethedig, y bwlch hyfywedd neu statws ariannol y cwmni.  

Bydd y ceisiadau (rhwng £5,000 a £50,000) yn cael eu hasesu’n llawn a bydd argymhellion yn cael eu cyflwyno gan aelod o’r Tîm Adfywio.  Gall pob awdurdod lleol benderfynu ar y gyfradd ymyrryd yn seiliedig ar amodau’r farchnad leol, a darparu hyd at 70% o gymorth grant. 

Penderfyniadau: 

• Cymeradwyo  
• Cymeradwyo gydag amodau
• Gwrthod – bydd cyfiawnhad llawn yn cael ei roi i unrhyw ymgeisydd y mae ei gais wedi’i wrthod  

A allaf gael benthyciad i dalu am y 30%+ sy’n weddill sydd ei angen ar gyfer y gwaith?

Gallwch, gall Cyngor Sir y Fflint ddarparu benthyciad ad-daladwy llog 0% i dalu am y gwaith (os yw’n gymwys) na ellir defnyddio’r grant ar eu cyfer (ffioedd cais yn weithredol).  Nid oes unrhyw ffioedd ad-dalu cynnar ar gyfer benthyciad o’r math hwn.  Cysylltwch â’r Tîm Adfywio ar e-bost ar regeneration@flintshire.gov.uk os hoffech fwy o wybodaeth. 

Neu, gallwch hefyd gael benthyciadau neu gyllid gan bartïon eraill ar gyfer y 30% sy’n weddill (bydd angen tystiolaeth o hyn). 

Erbyn pryd sydd angen i mi orffen y gwaith?

Fel rhan o delerau ac amodau’r grant, bydd dau ddyddiad allweddol yn cael eu cynnig - bydd un dyddiad yn nodi erbyn pryd ddylai’r derbynnydd ddechrau gweithio ar y safle, a’r llall yn nodi erbyn pryd ddylai’r gwaith gael ei gwblhau.  

Rhaid i bob cynllun gwblhau eu gwaith a’r gwariant erbyn diwedd y flwyddyn ariannol (Ebrill tan ddiwedd Mawrth). Bydd cyfarfod cyn-cychwyn gyda swyddog o’r Tîm Adfywio i sicrhau bod derbynnydd y grant yn fodlon gyda’r holl delerau ac amodau ac i drafod unrhyw faterion pellach o ran y prosiect. Gall swyddog cynllunio, neu swyddog perthnasol arall, hefyd fynychu’r cyfarfod hwn os oes angen egluro unrhyw faterion cynllunio.  Bydd y Tîm Adfywio yn gofyn i dderbynnydd y grant neu’r contractwr i osod arwydd grant mewn lleoliad amlwg. Mae hyn yn hysbysebu bod y grant ar gael ac yn hyrwyddo’r cyrff cyllido.

A fydd angen i mi roi diweddariadau mewn perthynas â’r prosiect?

Eich cyfrifoldeb chi yw monitro’r gwaith. Fodd bynnag, bydd y swyddog grant hefyd yn mynychu cyfarfodydd safle a dylid rhoi gwybod i’r swyddog am unrhyw wyriad oddi wrth y cynllun cytunedig.  Os na ofynnir am gyngor, efallai na fydd grant a gymeradwywyd yn cael ei dalu ar gyfer yr eitemau hyn. Dylid dweud wrth swyddog o’r Tîm Adfywio ynglŷn ag unrhyw newidiadau i fanylion deunyddiau, manylion adeiladu neu ddyluniadau, a, ble’n berthnasol, y swyddog cynllunio i sicrhau fod unrhyw newidiadau yn unol â gofynion cynllunio. Dylid dweud wrth y swyddog grant hefyd ynglŷn ag unrhyw newidiadau i gost neu amserlen y prosiect cyn gynted ag y deuir yn ymwybodol ohonynt. Sylwer y bydd y canlyniadau a roddwyd ar eich ffurflen gais am y grant yn ffurfio rhan o’r contract cyfreithiol i chi ei gyflawni, ac felly mae monitro yn rhan bwysig o ran cyflawni’r rhain.

Sut ydw i’n hawlio’r arian grant?

Bydd Cyngor Sir y Fflint yn teilwra’r modd o dalu’r arian mewn camau i’r ymgeisydd.  Pan fydd y prosiect wedi’i gwblhau, bydd ymweliad safle’n cael ei gynnal i arolygu’r gwaith (gellir gwneud taliadau dros dro ar gais). Dylid cynhyrchu cyfrif terfynol yn nodi’r holl waith a gwblhawyd. Gwneir hyn gan y contractwr, asiant neu bensaer. Rhaid i’r holl anfonebau gan y contractwr a’r ffioedd proffesiynol gael eu cyflwyno i’r swyddog grant. Dylid hefyd gynnwys cyfriflenni banc gyda’r rhain yn dangos fod yr anfonebau wedi eu talu. Gwneir asesiad ar y cyfrif terfynol, anfonebau a chyfriflenni banc. Yna ysgrifennir adroddiad a’i gymeradwyo gan swyddogion perthnasol.  Yna bydd y Tîm Adfywio yn gweithio gyda chi i drefnu taliad mewn modd amserol.

Sylwer y bydd angen cymeradwyo’r arian cyn y gellir gwneud y gwaith.

Astudiaeth Achos

Mae Mr Jones yn berchen ar adeilad yn Shotton a arferai fod yn Siop Cigydd.  Mae’r siop wedi bod yn wag ers 3 blynedd ac mae wedi dioddef fandaliaeth yn ddiweddar yn cynnwys torri ffenestr siop a thipio anghyfreithlon ar dir wrth ymyl yr eiddo. Y tu mewn, mae’r eiddo’n cynnwys ffenestr siop fawr, dwy ystafell ar wahân yn y cefn a arferai gael eu defnyddio fel lladd-dy.  Fe hoffai perchennog yr eiddo ddefnyddio’r adeilad fel Siop Trin Gwallt ac felly mae angen gwneud newidiadau mewnol tra’n cadw hen nodweddion yr adeilad. Ymysg y gwaith arall sydd ei angen mae gwneud yr adeilad yn fwy ynni effeithlon, gwaith uwchraddio trydan ac ail blastro.

Mae Mr Jones wedi dewis arolygwr a fydd yn archwilio’r eiddo’n broffesiynol, ac maent wedi cynghori ac amcangyfrif mai’r pris ar gyfer y prosiect fyddai £10,000.  Felly fe hoffai Mr Jones ymgeisio i Gyngor Sir y Fflint am £10,000 o gynllun Grant Gwella Eiddo Canol Tref.

Cam cyntaf Mr Jones yn y broses ymgeisio oedd cysylltu â thîm Adfywio Cyngor Sir y Fflint.  Cysylltodd Swyddog Adfywio o’r tîm ag o a threfnu cyfarfod byr i drafod y prosiect yn llawn.  Roedd Mr Jones yn gymwys i ymgeisio am Grant Gwella Eiddo Canol Tref, ac mae’r arian grant yn cael ei dalu’n ôl-weithredol.

Llenwodd Mr Jones ffurflen gais am Grant Gwella Eiddo Canol Tref ac roedd yn cynnwys dyluniad llawn o’r gwaith i ailwampio’r adeilad, dadansoddiad manwl o’r costau ar gyfer yr holl waith ac amserlenni ar gyfer y prosiect. Cafodd y cais ei gyflwyno i Banel Adfywio Sir y Fflint a bu Mr Jones yn llwyddiannus yn cael y cyllid grant llawn.

Derbyniodd Mr Jones y cynnig grant yn ysgrifenedig ac yna bu modd iddo fwrw ymlaen â’r gwaith.  Cafodd ddau ddyddiad, ac erbyn un o’r dyddiadau hynny roedd y gwaith fod i gael ei ddechrau a dyddiad i gwblhau’r gwaith hefyd.

Wrth i’r gwaith fynd yn ei flaen roedd yna broblem gyda’r gwaith trydanol a bu’n rhaid gwneud yn wahanol i’r hyn oedd ar y cynlluniau. Cysylltodd Mr Jones â’r Swyddog Grantiau o Gyngor Sir y Fflint i egluro y bu’n rhaid newid y cynlluniau, felly fe aeth y Swyddog Grantiau draw i adeilad Mr Jones er mwyn sicrhau bod y gwaith newydd yn dal i fod o fewn cyfyngiadau cymeradwyo’r grant, ac fe roeddynt.

Ar ôl i’r gwaith gael ei gwblhau a bod Mr Jones yn hapus gyda’r gwaith, fe wahoddodd y Swyddog Adfywio i’r safle er mwyn sicrhau bod y gwaith a wnaed yn cyd-fynd â’r gwaith oedd wedi’i fanylu yn y ffurflen gais am grant ac y byddai’r arian grant yn cael ei ryddhau cyn gynted â phosibl.  Fe luniodd Mr Jones ddadansoddiad terfynol oedd yn manylu ar y gwaith oedd wedi’i wneud.   Pan oedd y Swyddog Grantiau’n fodlon, cafodd yr arian grant ei ryddhau i Mr Jones.

O ganlyniad i’r grant, mae eiddo a fu’n wag am gyfnod hir bellach yn cael ei ddefnyddio eto, gan ddarparu incwm rhent rheolaidd i’r landlord, darparu llety o safon dda i fusnes trin gwallt lleol newydd, creu 2 swydd llawn amser newydd, ac mae rhan bwysig o dreftadaeth leol y gymuned yn cael ei gadw at y dyfodol.