Busnesau Sir y Fflint yn cefnogi talentau lleol mewn partneriaeth ag elusen o Gymru

Mae busnesau ym mhob rhan o Sir y Fflint yn helpu i drawsnewid bywydau pobl ifanc mewn partneriaeth ag elusen sy’n eu helpu i newid eu bywyd er gwell.

Gyda phresenoldeb ym mhob rhan o’r sir, bu WeMindTheGap yn gweithio gyda nifer o gwmnïau gwahanol fel rhan o raglen o’r enw WeGrow sy’n cynnig profiad o fyd gwaith i bobl ifanc.

Er mwyn gwella sgiliau’r bobl ifanc sy’n cymryd rhan, mae’r cynllun WeGrow yn cynnig chwe mis o brofiad gwaith gyda phedwar cyflogwr gwahanol, ynghyd â gwersi TGAU Mathemateg a Saesneg.

Un merch o Sir y Fflint a lwyddodd i gael gwaith ar ôl bod ar y cynllun yw Leah Griffiths.

Cafodd ei lleoli am gyfnod gyda Wall-Lag sy’n arbenigo mewn ynni adnewyddadwy. Bellach mae Leah yn aelod llawn amser o staff y cwmni teuluol, yn gweithio fel peintiwr ac addurnwr.

Meddai Leah: “Fel mam, roedd llwyddo i gael gwaith yn anodd iawn ond, gyda chefnogaeth Wall-Lag a WeMindTheGap, rwyf bellach wedi canfod fy swydd ddelfrydol.

“Roeddwn yn nerfus i ddechrau ond roedd yn braf dysgu sgiliau newydd a chwrdd â phobl wahanol. Rwy’n ddiolchgar iawn i’r rhaglen am fy natblygu’n bersonol ac yn broffesiynol.”

I Ben Clarke, 24 oed, aelod o griw’r cynllun WeGrow, hwn oedd ei gipolwg cyntaf ar fyd gwaith go iawn.

Yn dod o Sir y Fflint, mae’r rhaglen wedi gwella ei sgiliau datrys problemau wrth iddo asesu difrod strwythurol a chosmetig i adeiladau yn ystod cyfnod ar leoliad gwaith gyda Thîm Rheoli Asedau Cymdeithas Tai Clwyd Alyn.

Meddai Ben: “Cefais groeso gwych gan dîm Clwyd Alyn ac roedd fy nghydweithwyr wastad wrth law imi droi atynt am gymorth os oedd angen.

“Roedd gweithio tu allan i swyddfa draddodiadol hefyd yn fy siwtio i’r dim. Pleser oedd gweithio ar safleoedd tai yn gwneud yn siŵr fod pob eiddo yn cwrdd â’r safonau angenrheidiol.

“Roedd y profiad a gefais ar y rhaglen yn werthfawr iawn oherwydd rhoddodd gyfle imi ganfod y pethau a hoffwn am fyd gwaith, a beth nad oeddwn yn ei hoffi.”

Gyda’r elusen eisoes yn gweithio yn yr ardal, roedd yr arian a gawsant o gyfran Sir y Fflint o Gronfa Ffyniant Gyffredin Llywodraeth y Deyrnas Unedig (UKSPF) yn gyfle i WeMindTheGap gyrraedd mwy fyth o bobl ifanc yn y sir.

Laura Columbine yw Gwneuthurwr Cymunedol (Community Maker) yr elusen yn Sir y Fflint. Mae o’r farn fod y rhaglen yn chwarae rhan allweddol trwy ddatblygu sgiliau pobl ifanc a’u paratoi ar gyfer byd gwaith.

Meddai: “Mae llawer o bobl ifanc nad ydynt erioed wedi cael y siawns o fod mewn swydd ac mae cefnogaeth y gronfa UKSPF wedi bod o help hanfodol inni bontio’r bwlch yma a pharhau i gynnig ein gwasanaethau allweddol.

“Trwy dderbyn arian UKSPF ar gyfer ein prosiect rhithwir WeDiscover, a’n rhaglenni WeGrow a WeBelong, rydym wedi llwyddo i gynnig cymorth a dilyniant parhaus yn Sir y Fflint.

“Nid yn unig y mae ein rhaglenni yn gwella siawns pobl ifanc o gael gwaith, mae eu hyder a’u sgiliau cymdeithasol hefyd yn blodeuo wrth iddynt ddysgu gweithio mewn tîm a chwrdd ag enghreifftiau ysbrydoledig o bobl leol o bob math o gefndiroedd sydd wedi llwyddo.

“Mae’r arian UKSPF a gafodd WeMindTheGap gan Gyngor Sir y Fflint hefyd wedi ein galluogi i sefydlu hwb gwaith ym Mhafiliwn Jade Jones, lle mae gofod diogel, cyfeillgar a chroesawus i ymgysylltu’n fwy effeithiol â’r cymunedau yr ydym yn eu cefnogi.

“Edrychwn ymlaen at weld effaith ein prosiectau ar drigolion yr ardal.”

Meddai’r Cynghorydd Chris Dolphin, aelod cabinet Cyngor Sir y Fflint dros yr economi, yr amgylchedd a hinsawdd: “Mae’n wych gweld bywydau pobl ifanc ein sir yn cael ei drawsnewid gan y cydweithrediad rhwng WeMindTheGap a phartneriaid busnes lleol. Bydd hynny’n sicr yn gwella eu hunan hyder a’u siawns o gael swydd.”