Cymorth gyda chasgliadau

Mae ein gwasanaeth casgliad â chymorth ar gyfer gwastraff ac ailgylchu wedi cael ei ddylunio i unrhyw un sydd methu symud eu bin olwynion neu fagiau a chynwysyddion ailgylchu i ymyl palmant neu fan casglu ar y diwrnod casglu.    

Mae hyn yn golygu y bydd ein criwiau casglu yn casglu eich cynwysyddion ailgylchu a gwastraff o leoliad ar eich eiddo sydd wedi’i gytuno gyda chi, a’u rhoi nhw’n ôl yno.  Ni fydd criwiau ailgylchu yn mynd i mewn i’ch cartref, ac ni fyddant yn didoli eich eitemau ar gyfer ailgylchu.

Gellir gwneud casgliadau â chymorth ar sail dros dro, neu am y tymor hir yn dibynnu ar eich amgylchiadau chi.

Dim ond ar gyfer preswylwyr sydd ag angen gwirioneddol am gymorth, naill ai drwy salwch neu anabledd a phan nad oes neb arall ar gael i helpu symud y biniau neu gynwysyddion i ymyl y palmant neu fan casglu ar y diwrnod casglu y mae casgliad â chymorth ar gael. 

Fe fydd casgliad â chymorth yn cael ei ddarparu pan ofynnir amdano i: 

• Breswylwyr anabl sy’n cael anawsterau neu breswylwyr sydd â chyflwr neu salwch hirdymor sy’n golygu nad ydynt yn gallu symud cynwysyddion gwastraff ac ailgylchu  i ymyl y palmant a bod yr amgylchiadau yma’n annhebygol o newid.  
• Preswylwyr sydd â salwch dros dro neu sydd wedi cael llawdriniaeth gan olygu nad ydynt yn gorfforol gallu symud y cynwysyddion gwastraff ac ailgylchu i ymyl y palmant am gyfnod. 

Ym mhob achos, efallai y bydd angen cadarnhad a/neu dystiolaeth o’ch amgylchiadau i gefnogi eich cais. 

Trefnu cymorth gyda chasgliadau

Unwaith y bydd casgliad â chymorth yn cael ei gymeradwyo, fe gytunir ar fan casglu addas, lle gall ein criwiau gael mynediad iddo, a bydd casgliadau’n digwydd o’r fan honno.  Efallai y bydd yn rhaid cynnal asesiad risg cyn i unrhyw gasgliadau ddigwydd o’r man yma.  Bydd y criw casglu yn dychwelyd pob cynhwysydd i’r man casglu a gytunwyd pan fyddant wedi cael eu gwagio.  Mae’r Cyngor yn cadw’r hawl i dynnu unrhyw drefniant casgliad â chymorth yn ôl o unrhyw eiddo y mae’r criwiau casglu yn credu sy’n anniogel iddynt gasglu ohonynt. 

Gan y bydd y gwasanaeth casgliad â chymorth yn cael ei adolygu’n flynyddol yn y dyfodol, fe fyddwn ni’n cysylltu â chi eto mewn 12 mis i ofyn a ydych chi’n dymuno parhau i dderbyn y gwasanaeth ac ailymgeisio am y gwasanaeth am 12 mis pellach.   Oni bai eich bod yn dymuno parhau â’r gwasanaeth ac ailymgeisio, fe gewch chi 3 wythnos o rybudd y bydd eich casgliad â chymorth yn dod i ben ac ni fyddwch chi’n derbyn y gwasanaeth ar ôl yr amser yma.  Os ydych chi dal angen gwasanaeth casgliad â chymorth, ailymgeisiwch ar-lein.

Os nad oes gennych chi fynediad i’r rhyngrwyd neu wasanaethau ar-lein, gallwch lenwi ffurflen gais ar bapur yn un o’n Canolfannau Cysylltu neu drwy ffonio ein Canolfan Alwadau ar 01352 701234.  Os nad ydych chi’n dymuno derbyn y gwasanaeth casgliad â chymorth, gadewch i ni wybod drwy ein Canolfan Alwadau drwy ffonio 01352 701234.