Newyddion Diweddaraf Cyngor Sir Y Fflint
Haf mwyaf llwyddiannus SHEP hyd yma yn ysgolion Sir y Fflint!
Published: 11/08/2021
Mae dros 160 o blant a phobl ifanc 5-12 oed wedi elwa o’r rhaglen Cyfoethogi Gwyliau Ysgol (SHEP) yr haf hwn!
Mae chwe ysgol wedi cadw eu drysau ar agor am dair wythnos gyntaf gwyliau’r ysgol, diolch i staff ymroddgar sydd wedi cydlynu rhaglen gynhwysfawr gydlynedig o weithgareddau i’r plant.
Mae Ysgol Treffynnon ac Ysgol Gynradd Queensferry, Glannau Dyfrdwy wedi cyflwyno rhaglenni yn llwyddiannus yn y gorffennol ac mae Ysgol Maesglas, Ysgol Maesglas Greenfield, Bryn Garth, Penyffordd, Ysgol Bryn Gwalia, yr Wyddgrug ac Ysgol Uwchradd Cei Connah wedi cyflwyno’r haf hwn am y tro cyntaf.
Bu i’r plant oedd yn mynychu fwynhau brecwast, byrbryd a chinio poeth iach wedi eu darparu bob dydd gan Arlwyo NEWydd. Mae Bwyd a Hwyl SHEP yn canolbwyntio ar addysg maeth, ac yn annog plant i flasu bwydydd newydd a chymryd rhan mewn gweithgareddau bwyd ymarferol trwy’r rhaglen.
Bu i Arweinydd Cyngor Sir y Fflint y Cynghorydd Ian Roberts a’r Prif Swyddog Addysg ac Ieuenctid Claire Homard ymweld â dwy ysgol oedd yn darparu SHEP:
yn Ysgol Maes Glas
ac Ysgol Uwchradd Cei Connah.
Dywedodd y Cynghorydd Roberts:
“Mae SHEP wedi bod yn boblogaidd iawn yr haf hwn sy’n atgyfnerthu’r effaith gadarnhaol y gall gweithio mewn partneriaeth ei gael yn ein cymunedau. Nid yn unig bod y rhaglen wedi rhoi cyfleoedd i blant ddysgu a bod yn actif dros y gwyliau, ond mae nifer wedi gwneud ffrindiau newydd sydd mor bwysig i'w lles, yn arbennig ar ôl y 18 mis diwethaf.
“Edrychwn ymlaen at ehangu Bwyd a Hwyl SHEP i fwy o ysgolion yn Sir y Fflint yn 2022.”
Dywedodd Claire Homard:
“Mae Hamdden Aura wedi chwarae rhan allweddol i gyflwyno gweithgareddau chwaraeon strwythuredig a gemau rhyngweithiol ym mhob ysgol. Cyflwynwyd cyfanswm o 17 o gampau gwahanol gyda staff Datblygu Chwaraeon yn hyfforddi bob sesiwn. Roedd osgoi’r bêl, tenis a rygbi yn boblogaidd iawn eleni! Mae bob hyfforddwr wedi mwynhau’r sesiynau'n fawr ac yn hapus iawn gydag ymgysylltiad y plant.
“Roedd yr amrywiaeth o weithgareddau cyfoethogi oedd ar gael i'r plant eleni yn ardderchog ac yn cynnwys gwneud lampau lafa o boteli a ailgylchwyd, dreamcatchers, cylchoedd allweddi pren a phlaciau enwau graffiti ymysg eraill. Mae plant wedi cael cyfleoedd i gymryd rhan mewn sesiynau ymwybyddiaeth ofalgar, dawns a gweithdai drymio. Roedd rhywbeth i bawb a digon o gyfleoedd i’r plant roi cynnig ar rywbeth newydd!
"Hoffwn longyfarch a dweud ‘da iawn' wrth bawb oedd yn rhan o wneud y rhaglen Bwyd a Hwyl SHEP yr un mwyaf llwyddiannus erioed!”
Nid oedd rhieni yn gallu ymuno â’u plant ar y safle i gael prydau eleni oherwydd cyfyngiadau Covid. Fodd bynnag, i annog teuluoedd i gymryd rhan yn y gweithgareddau coginio gyda’u plant yn y cartref, bu i Arlwyo NEWydd ddarparu bocsys bwyd i bob plentyn ar ddiwrnod olaf y cynllun yn cynnwys chwe cherdyn rysáit iach a blasus, ynghyd â’r holl gynhwysion.